【活捉走地股】景福集團280借兩大憧憬開炒 旗形突破在即下站睇0.7元

日期:2021-06-11
更新時間:13:57:10

兩大憧憬刺激下,本地消費股要睇實,特別係景福集團(00280.HK)市值只得4億銀,加上走勢剛剛做緊一支旗仔,如果旗形突破升幅不得了,一升穿0.51元,下站睇0.7元。

受惠金價重上1900美元水平,龍頭股周大福(01929.HK)今年來累升達五成,280近期先大追落後,低位0.33元起步,一度衝上0.51元。

但280最新市值亦不過3億幾、4億,相對公司資產淨值(NAV)6.47億,相當於每股NAV 0.71元,仍有唔少追落後空間,更重要一點公司資產大部份係現金,以及存貨(即黃金、珠寶等),短線追返市賬率1倍、上望0.71元先叫合理。

若然要追返周大福嘅市賬率5.4倍水平,280甚至有權上望3.8元水平。

鐘表珠寶股短線有兩大炒作憧憬,一係通關,二係360億消費券。

周大福已經講明將配合消費券政策,提供購買優惠,一班同業勢必跟隨,相對於周大福一年銷售額701億元,消費券只係錦上添花。

但280市值亦不過4億,一年銷售7億幾至9億元,消費券對280影響力明顯強勁得多,加上估值大落後兼近期有資金開炒,現價追入絕對超值,一升穿0.51元有機會出現搶貨局面,甚至有機會舉挑戰0.7元大關。

相關評論

相關評論