【活捉走地股】賭業新勢力入主 澳門勵駿1680只會越炒越乾

日期:2021-02-23
更新時間:13:22:53

滙控(00005.HK)亦宣布恢復派息,賭股炒復甦概念應最少炒到下月初國內兩會,龍頭賭股當然得,但二、三線賭股亦有兩隻好選擇,分別係信德集團(00242.HK)、澳門勵駿(01680.HK),其中1680相當落後,舊年獲新主入場之後未炒過,貨源極乾,一炒可以好癲。

1680新主陳榮煉去年9月以1.05元入場兼提出全購要約(G.O.),之後有多達7.71億股接納。

呢一個動作,令1680有四大要點:
一)新主陳榮煉持股升至33.19%;
二)「賭王三太」陳婉珍一股未減,持股量仍然有16.33%;
三)公眾股東持股量由29.08%,降至16.7%,貨乾程度大增
四)原來陳榮煉係澳門猛人,博彩中介人排名僅次於「洗米華」周焯華,陳榮煉又於柬埔寨、菲律賓、韓國有賭場業務

1680似乎係陳榮煉「升呢之作」,今次仲拍住「賭王三房」人馬合作,未來更有注資憧憬。

1680未乎合港交所公眾持股25%要求水平,最理想當然要等佢配一次股,恢復公眾持股水平,但短線市場大炒賭股反彈,1680有機會受氣氛帶動向1.6、1.7水平挑戰。

相關評論

相關評論