今晚「目及」靚股梁風

【今日吹乜風】梁風：有人叫我小心武漢沙士引發負資產

武漢肺炎爆發，再有朋友叫我小心沙士負資產嘅事，實際上如果再發生咁嘅市況係買樓良機。2002年中原城市指數高位40.28點（見下圖），去到2003年8月頭低見31.77點，跌幅21%。但沙士一過去，2004年8月頭，樓價指數升到45.27點，比2002年高位仲要升多一成幾，比沙士低位計升幅42.49%。中原指數網址：Http://www1.centadata.com/cci/cci.Htm對比起沙士呢類一階段事件，美國重啟加息周期呢類長期因素更影響供樓人士。好彩，今年內都唔見美國有加息嘅意欲。老實講，近幾年幾條辣條影響下，買得香港樓嘅人都好有實力，再唔同1997年個個借到盡狗衝，雖然有水份，但槓桿有限。順手講個故事呃字數，小弟有親戚都係地產經紀，當年經介紹跟過某位猛人做過幾日「艇仔」，呢位猛人勁在97年近乎「空手入白刃」（零資本）炒幾層樓，97年爆煲當然中晒招，由當年過千萬身家，變欠債幾百萬。佢同我講「我差啲跳落去」，但佢冇咁做之後一路死撐跑數，到我識佢時（約2004年），佢已經還清晒。我之所以一直記住呢個猛人，一個原因係佢嘅意志力，另一個原因係佢真係好敬業，佢唔係亂吹一通呃啲客，個新盤周邊有咩交通工具、有咩設施都一清二楚，真係幫個新盤做晒功課咁去Sell樓，呢份專業亦令我印象相當深刻。可惜小弟真係對樓興趣不大，跟咗佢幾日就唔做了。所以有人話我「中樓毒」，我不嬲都唔認同。我買樓只係因為我見到個大環境要迫住買，其實我係中咗嘅係「Number降」。

財經快訊

今晚「目及」靚股

2020-1-24 10:59:03

【今日吹乜風】梁風：要準備「別人恐懼，我貪婪」

肺炎問題真係好困擾大市，市場情緒極差，啲短炒貨都係要執執佢，減磅過年，港股試緊250天線27700點，我估最悲觀情況有機會試埋26000點。點解咁灰？武漢剛剛先封城，班人臨封城前著草晒去其他地方，即係仲有更多利淡消息未爆，26000點唔係冇機會。但睇返2003年樓市咁，樓價恐慌式插完，一冇事就會大反彈。個市咁跌法，可能真係影響咗一啲刁，傾緊賣盤嘅松齡護老（01989.HK）今日就曾經跌67%，低見0.44元，最新彈返上少少，報0.58元。同股領袖傾開計，佢有一句講得幾岩：「賣唔成都唔洗$0.44掛」；社長陳承龍都係Fb講「1989未至咁cHeap。」1989最新報0.54元，市值唔夠5億，公司真係有業務，真係唔應該咁平，都反映個市連撈底資金都少，個個唔想坐貨過年，如果有勇者，1989呢啲位真係可以撈一撈，話唔定可以成功「別人恐懼，我貪婪」。

財經快訊

今晚「目及」靚股

2020-1-23 14:15:02

【今日吹乜風】梁風：半新股派對再起睇實1763、2231兩隻倍升潛力股

半新股派對嚟緊，社長隻景業名邦集團（02231.HK）穿完上市價慢慢爬到3.4元水平，我自己睇，下階段阻力位3.5至3.7元，到時會有班想賺少少嘅獲利盤阻住你，但畀班大戶掃埋就變中煙（06055.HK）啲大炒格局。今日幾靚嘅中國同輻（01763.HK），之前走地股已經提過大家，捱咗幾日終於破到21.6呢個大阻力，一破就升8%，都預咗佢古惑，係估唔到咁辛苦，等咁耐。補充多少少：剛剛1763 喺23.5元見到一個大盤直掃，涉及233萬元，呢隻又係有潛力炒到癲，先睇30元大位。參考1763，同樣近期提過嘅京投交通科技（02660.HK）都係偏低，0.8元呢個阻力位都消化咗好耐，上次借公司盈喜踢到0.87元，之後回返晒落嚟，睇實盤路，一旦又升穿0.87元可能要追。

財經快訊

今晚「目及」靚股

2020-1-17 14:30:06

【今日吹乜風】梁風：海隆控股1623破到會好有力

油價反彈，熟我嘅朋友應該都知，我一向好避免買油股，但我會叫大家買油服股，原因係油價好難估，但油服股只要油價喺50美元樓上嘅大位企穩，訂單就會正常返，更何妨60美元樓上都幾有支持。海隆控股（01623.HK）昨日亦有喺《活捉走地股》推介，今日繼續繼續上攻0.9元阻力，呢隻我短期都幾有信心，1.1元唔難上，合理價應該喺1.4元樓上。近期國內成立國家管網公司，係繼鐵塔（00788.HK）之後，阿爺再整合國內石油天然氣管道資源。大家都憧憬會有利海隆控股等上遊油服股，睇返光大份報告就話，管網公司會引入民營資本，用於擴建管網。兩大利好因素包括：第一，能夠推動天然氣價格改革，形成競爭性市場定價機制；第二，天然氣全產業鏈體量擴大，為市場注入新活力；第三，優化管網及配套設施，完善天然氣基礎設施建設。根據國家發改委管道發展目標，2025年我國天然氣管道總里程將達到16.3萬公里，國家管網公司成立後，便於統籌佈局國內天然氣管道事業，吸引社會資本進入天然氣相關行業，推動管網基礎設施建設加速。細價油服股仲係大低位，1623短線睇實0.95阻力，上望下個關口1.1元，下站再睇1.4元。最緊要隻股PE低，未來有憧憬，買咗真係唔使擔心。

財經快訊

今晚「目及」靚股

2020-1-7 10:21:08

【今日吹乜風】梁風：14隻新股花多眼亂呢隻最啱炒鬼胃口

2019年最後一日，有多達14家新股齊齊招股趕尾班車，合計集資金額多達60億元。咁多隻新股當中，做清潔業務嘅Hygieia國際（01650.HK）好似幾有炒作潛力，最高集資額只得1.5億元，招股價只得0.25至0.3元，上市初段應該點都有格仔黨會睇住炒。但「細細粒，容易食」只係其中一個重點，更重要係呢隻新股竟然係由富強金融（00290.HK）同寶新金融（01282.HK）兩班深圳幫人馬聯手做「聯席全球協調人、聯席賬簿管理人及聯席牽頭經辦人」。寶新金融前身即係中國金洋，畀寶能系姚建輝入主之後，最近先改名做寶新金融。1650上市之後先得5億至6億元市值，一上市就0.25至0.3元，合晒炒鬼胃口，特別係兩班深圳幫合作，應該會拉埋一班大媽表叔落場。1650初段孖相信會大爆，股友有興趣要用孖展抽，隨時係10手中1手、甚至20手中1手嘅局面，抽中之後上市初段沽應該有份「新年禮物」賺下。

財經快訊

今晚「目及」靚股

2019-12-31 10:24:38

【今日吹乜風】梁風：爬格仔可留意萬桐園

昨日預期港股短線有200至300點回調，但實際卻只回吐得百多點，反映股市買盤力度強勁，今日更見一開市即見彈升122點，周內挑戰28000點關口概率甚高。中國萬桐園（06966.HK）今日轉主板，走勢上似乎有爬格仔商機，格仔黨可以留意。5毫子樓下可以密密爬，若然衝破5毫子樓上就小注坐下，最理想係可以Free 貨放紙鳶。

財經快訊

今晚「目及」靚股

2019-12-17 9:37:10

【今日吹乜風】梁風：講少少個人感受

頭先做節目時表現得極差，自己都唔知自己想表達啲乜了。今朝遲到主要原因係琴晚實在太多嘢諗，到底香港會點發展呢？仲生唔生小朋友好呢？係咪要移民？女朋友悲觀得好緊要，但我就偏向樂觀，黎明前夕永遠要經歷最黑暗嘅時期。過去呢幾個月，我見到一個新香港嘅誕生。一班淨係識搵錢享受嘅香港人，錢都唔搵，罷工走上街頭；一班新香港人，比我哋呢班「廢中」、老鬼更有獅頭山精神，走得比任何人都更前。經歷呢幾個月之後，香港人畀到我前所未有嘅信心，比以前任何一段時間更令我值得信任。我相信就算我生仔之後有咩事，香港人可以畀小朋友一個正確嘅思想。

財經快訊

今晚「目及」靚股

2019-9-5 11:34:33

【今日吹乜風】梁風：「劉德華唔會講大話」認同請分享

近年有種消息威力真係勁過「路邊社」，就係WHatsapp Group同FacebooK上瘋傳嘅消息，今日小弟就分別喺一位90後同一位70後口中得知阿倫（譚詠麟）買Bitcoin，好多閒錢嘅70後仲同我講一齊買注仔玩下，仲猛叫「試下啦」。而事實呢單新聞當然係假消息啦，係某個新加坡Bitcoin交易平台嘅宣傳手段。阿倫嘅經理人公司「藝能製作」亦都發咗聲明否認。聲明內容如下︰其實我都冇留意呢單消息，但「謠言最愛懶人」，都係Google一下已經成功Fact CHecK（事實查核）。更重要一點嘅係，呢單假消息真係引起咗70後嘅興趣（阿倫幾時做咗投資高手？），仲繼續叫我「試下啦」，一人一半咁話。事實上緊係因為買Bitcoin好多手續，佢作為一位錢太多嘅人士，唔想搞手續而拉我落水。事件亦都反映咗，有好大部份人真係唔理真假，只要啱聽。諗返近期亦有長輩傳一啲聲稱係「誠哥」寫嘅文章畀我睇，事實當然唔係啦，仲要係差唔多5年前嘅假文，亦證明套用名人，加幾句懶係大道理嘅假消息永遠有生命力。正如家英哥話齋「劉德華唔會講大話」，出名到好似劉德華咁，講咩都冇所謂。因為當出名到好似劉德華咁，有一部份人就會停止思考，唔會捉佢嘅說話錯處，「今時今日咁嘅服務態度唔夠㗎」，無論個客幾西，無論你已經幾盡力，甚至跪係到幫個客奶鞋底，都唔夠㗎。當一話係劉德華講，大家都唔查、唔諗，咁又點會證明到劉德華會講大話呢，呢句說話亦自動變成真話，。#劉德華唔會講大話 #認同請分享梁風專頁：Https://www.facebooK.com/梁風-748754761840439/

財經快訊

今晚「目及」靚股

2019-9-4 11:34:10

【靚股齊齊「目及」】恒指會升上10萬點（梁風）（第201期）

港股、A股、美股的強勢股分別都於高位出現見頂，在加息周期下，投資市場的壓力的確越來越大，市場淡友人數越來越多，並開始出現近乎「末日預言」式的睇淡言論，例如有人話個股市會跌至得返幾千點。恒指跌淨幾千點是什麼概念？2003年，香港沙士時期，恒指低見8331點；2001年，美國911受襲，恒指見9493點；1998年，亞洲金融風暴之後，港股低見6660點。以執筆當天（周二）恒指收報24585點計，恒指還要再跌六成才能算是四位數。按此推算，滙豐（005）值25元左右、騰訊（700）值100元左右、建行（939）值2.48元左右。小弟初初2009年買工行（1398）、建行時，正正是2蚊幾水平，乜都唔識，只係敢於入市，個幾月就賺了幾成。當時中信股份（267）前身中信泰富7個幾，我望到10元頭先敢入市，彈到14蚊走。都係嗰句當時我真係乜都唔識，只係敢入市。十年過去了，當年建行每股淨資產僅2元人民幣，2018年6月底，卻是7.14元人民幣，多了2.57倍，即使中國有任何債務危機，建行還是有其價值。十年前2元買建行的機會只是一閃而過，別說2元，如果今日有機會以4元買建行，我也會瞓身去買。我在本欄不斷提大家要小心內銀股，因為有人民幣貶值這個大因素，會形成一個「收息陷阱」，令大家以為內銀好高息，其實比大家想像中為低。但不代表一隻有實業的藍籌是一文不值的，正如2009年的中信泰富。市場恐慌正是入市好時機，或許小弟不應該介意這些製造恐慌的言論，而是要多謝佢，令市場上信心弱的人士提早離場。恒指會跌至四位數的這些預言，小弟實...

財經快訊

今晚「目及」靚股

2018-11-1 16:39:17

【靚股齊齊「目及」】中美難和解短線等人仔穿「7算」（梁風）（第198期）

大市向下的勢頭明顯，多隻藍籌股已跌穿52週低位，小弟一直強調大家要留意的人民幣走勢，亦曾跌穿1美元兌6.93人民幣的水平，短線很大機會下試「7算」大關，7算關口一穿，滬指會跟隨跌破2700點。騰訊（00700.HK）跌穿300大關成近期關鍵，走勢上要再向下尋底，但從299到295的走勢來看，買盤完全沒有支持。投資騰訊不是沒有商機，只是市場情緒加政治因素，都對騰訊股價相當不利，所以現價還是要再跌，但這些沽壓何時會完，相信要等「阿爺」調頭撐騰訊。多隻重磅藍籌創緊52週新低，執筆當日又有224隻股份創52周新低，反映股市去到呢個水平，過去一年先入市嘅人幾乎都要輸錢，除非好似社長咁掉頭「熊霸天下」，對沖一下持倉。比較安全嘅做法，就緊係實行「現金為王」嘅策略，但要記住唔好揸人民幣，而係揸美金或者港元。如果要揸人民幣，或者做人民幣相關投資，一定要等人民幣匯價試完個底做反彈先可以慢慢開始，現階段唔需要太心急住。因為中美關係不斷惡化，最近更逐漸步入「新冷戰時代」，所以要再次強調一下，今日市況不再單靠技術分析、價值投資可以得到答案，影響最重的還是政治因素。市場傳出最新消息指，美國要求中國提供清單詳細說明如何讓步，否則總統特朗普將不會在二十國集團（G20）會議上，與國家主席習近平進行貿易磋商。雖然有指中方原意是準備就貿易戰問題上讓步，但報道指，中方卻擔心美方一再「反口」，故要求要有一位全權代表特朗普談判的官員出面。然而，人民幣不斷貶值的問題又成為中美另一個談不攏的議...

財經快訊

今晚「目及」靚股

2018-10-14 12:00:33