【詞海翻波】520嘅疑問（張皓曦）
「廣東話係唔係母語」我相信咁低能又無聊嘅問題，稍為用吓個腦都知答案，就正正係因為低能又無聊，估你唔到地政府都可以拎出嚟講，先會引發軒然大波，早排好多人喺社交網絡唔係打句「我母語係廣東話」、「堅持講廣東話」就係轉頭像，用唔同方式去表達自己睇法，之不過當中有幾多人喺5月20號嘅呢日，同樣都會喺同一個平台講「520愛的宣言」？「520」用普通話或者國語讀就係近似「我愛你」嘅普通話或者國語讀音，所以，以呢兩種語言做母語嘅人，都會對呢日抱有一種充滿幸福愛意嘅想法，咁唔係用國語同普通話做母語嘅人呢？如果呢頭叫人捍衛廣東話，嗰頭就「520愛的宣言」未免俾人有種「精神分裂」嘅感覺。「粵語」係「嶺南文化」嘅其中一種，所謂「嶺南文化」有狹義同廣義之分，如果簡單講，廣義就係指五嶺以南，即係廣東、廣西、海南一帶嘅文化，語言上「粵語」只係其中一範，仲會有「潮洲話」、「客家話」同埋一部分少數民族語言。「粵語」起源於漢朝好多人都知，而正確啲講，係嚟自西漢嘅一個藩屬國：南越國嘅語言。南越首都就係而家嘅番禺，國土範圍包括而家嘅廣東、廣西大部分地區、海南、港澳地區珠江三角洲一帶、越南中至北部同埋丁丁咁多多嘅福建，呢個國家曾經向漢高祖稱臣，後嚟幾次反面，漢武帝將佢滅咗國，但係無滅族，當地人同漢人有丁點兒文化融合，同時亦建構咗「粵語」嘅雛型。後來到唐朝滅亡，去到五代十國時期，中原戰亂頻繁，好多中土人士着草南下，去嶺南一帶避風頭，更加將兩者文化融合加深，當中包...
2018-5-20 10:41:49
