【高明邏輯】大奇跡日常態化(高明)
近期美股常見一個現象,就係臨瞓前指數大跌,翌日起身已經係只跌少少,甚至止跌回升。以前舊世界,我哋會稱之為「大奇跡日」,唔多唔少受到電視劇「大時代影響,現時新聞標題亦時不時稱之為「大奇跡日」、「小奇跡日」。不過,奇跡,根據字面定義,就係極少情況下先會發生。如果一件相同嘅V型反彈,可以一個月至少出現一兩次,又點能夠稱之為奇跡呢?但活生生的事例又告訴我們,幾乎每個月都可以見到有主要指數單日轉向V型反彈,所以上述標題指出:大奇跡日常態化,係已經發生嘅事。究竟點解大奇跡日會成日發生,呢件事至少有兩個原因:一、資訊越嚟越快,一個手機pusH notification已經可以話你知特朗普啱啱諗緊乜,有別於過去總統要經過白宮公佈,再通過記者,然後電視廣播或第二日出報紙你先見到同一單新聞。既然依家資訊傳播得快,啲人就好容易會反應快,一個消息立即反應過敏狂賣,然後觸發程式盤後跌得更多,造就半日單邊發展,當沽壓單日已用盡,成日流流長又覺得冇乜問題,可能又有人傳第二啲消息出嚟,簡簡單單就可以挾返上去。二、資訊流動得快嘅結果係人類變得極冇耐性。恃老賣老咁話,想當年高明用DOS或Windows 3.1年代,仲用緊Floppy,安裝隻新Game要等半日;剛有得上網時56K,上網同朋友對戰AOE要撥號。自從iPHone有FlasH Memory加埋寬頻上網後,你有冇發覺,所有人都毫無耐性,之前一秒叫你做嘢,已假定你好似微波爐咁五秒後有得食,如果你做唔成就係你無能,諸如此類,大眾有咁嘅心態,都係大環境所致,...