【活捉走地股】雲南白藥佈局三年大茶飯 萬隆30大麻概念未炒夠

日期:2021-01-14
更新時間:12:59:57

拜登入主白宮,美股大麻股勁抽,APHA、HEXO、CGC隻隻累升幾成,HEXO喺11月頭只係2.5美元水平,琴晚高見6.87美元,唔夠三個月升幅達1.7倍。港股都有唔少大麻股,萬隆控股(00030.HK)近期以大成交一舉突破2019年高位,有齊開炒訊號,單計雲南白藥做大股東加上大麻概念,未來仲有唔少上望空間。

萬隆30於2017年引入雲南白藥做大股東,之後雲南白藥再加碼,認購一批可換股債券(CB),一旦兌換持股量會由29.59%,大增至51.06%。

自雲南白藥入場後,30全力轉型為大麻概念股,其中重點產品係「大麻二酚(CBD)+美容」嘅應用,近期並已開設國內網上零售平台,進軍中國市場。

目前已經進入「萬事俱備,只欠東風」嘅階段,公司公布,已就「於網上銷售含CBD成份的化妝品及個人護理產品的合法性」諮詢中國法律顧問。

但30又點止「大麻+美容」呢一步,雲南白藥以「白武士」身份入場,佈局三年有多,30已成為集團系下大麻業務嘅上市平台,CBD成份主治抗炎、止痛,以及紓緩抑鬱及失眠等問題,又有不上癮特點,用於醫藥市場前景更大,亦與雲南白藥本業有高度協同性,未來進一步合作、注資可能性極高。

30能夠升上現水平,已經反映街貨量有限,全由信心十足嘅投資者持有。計及CB因素,30短線突破0.54元即係已經超過50億市值,升穿港股通門檻隨時進另一個爆升階段,以雲南白藥接近2000億市值,萬隆炒上1元水平亦唔出奇。

相關評論

相關評論